Քեֆ անողին քեֆ չի պակսի, մնում է քթից չբերեն:

Ինչքան շատ լեզու իմանաս, մեկ է, եթե հարևանիդ հետ լեզու չգտար, կորած ես:

Լավություն արա, գցիր ջուրը, մեկ է` ում անում ես, նա է գցելու:

Ամառը կովերին կեր, նոր պառկիր հովեր, որ ձմեռը չսատկեն կովեր:

Եթե գործերդ ձախ են գնում, մի նեղվիր, մի օր էլ քո բախտը կբերի` դու ձախ կգնաս:

Միշտ մեծ-մեծ խոսիր. մանր-մունր բաներին ո՞վ է բանի տեղ դնում:

Ուրիշի եղածին աչք մի գցիր, աշխատիր ձեռք գցել:

Ավելի լավ է հիմար-հիմար դուրս տաս, քան հիմար-հիմար ներս գցես:

Տասը չափիր, մեկ կտրիր. հիմարություն, մեկ է սխալ ես կտրելու,հիմա էլ ասելու են` հո ապուշ չես, էդքան չափեցիր, սխալ կտրեցիր:

Գործդ վաղվան մի թող, վաղն այնքան էլ հեռու չէ, գցիր անցյալ, թող անցած լինի:

Մի ձեռքը ծափ չի տա, բայց կարող է լավ փող մուրալ:

Ընկածին մի հարվածիր, չես իմանա` վեր կենալուց հետո ինչ կարող է անել:

Աշխատակիցներիդ այնքան ծանրաբեռնիր գործով, որ ժամանակ չունենան քո անգործությունը քննարկելու:

Ձու գողացողը հավին չի վախեցնի, թե չէ որ հավը ձվից կտրվեց, ստիպված ձին է գողանալու, հետո էլ վրան ասացվածք գրեն:

Ամառ օրով ինչքան շա~տ ալար, էնքան լա~վ դալար:

Ինչքան ուշ, այնքան երբեք:

Ինչքան շատ ալար, այնքան քիչ դալար :

Закон подлости –արտոնագրված օրենքներ, որոնք բացառիկ իրավունքով գործում են ՀՀ տարածքում:

Ինչքան շտապ է զանգահարելը, այնքան հեռախոսը արագ է լիցքաթափվում:

Ինչքան հարկավոր է ինտերնետը, այնքան դանդաղում է կապը:

Եթե քեզ բան չեն ասում, դա դեռ չի նշանակում, որ քեզ ընդհանրապես բան ասող չկա:

Եթե քեզ բան են ասում, նշանակում է`քեզ հա էլ բան են ասելու:

Զարթուցիչը զնգում է հենց այն պահին, երբ իսկականից քունդ տանում ա:

Գործերը թափվել են գլխիդ, պարապությունից չգիտես ինչ անես:

Հետևություն. եթե պարապությունից չգիտես էլ ինչ անես, ավելի լավ է գործդ անես. մեկ ա, պիտի անես:

Ապակիները լվանում ես թե չէ, անձրև է գալիս:

Հետևություն. եթե անձևի «ախորժակ ունես», կամ պատուհանի ապակիները լվա կամ ավտոմեքենա:

Ինչքան շուտ ես արթնանում, այնքան շատ ես ուշանում աշխատանքից:

Հետևություն. շուտ էլ արթանանաս, ուշ էլ, եթե մշտապես ուշանում ես, ուրեմն` կուշանաս:

Մոտենում ես թե չէ կանգառին, երթուղայինդ շարժվում է:

Հետևություն. եթե արդեն գիտես, որ մոտենալու ես կանգառին թե չէ  երթուղայինդ գնալու է, ուրեմն մի քանի րոպե  շուտ մոտեցիր էլի, այ տնաշեն:

Որ օրը պայուսակից հանում ես անձրևանոցը, հենց այդ օրն է անձրև գալիս:

Հետևություն. եթե արդեն գիտես, որ պայուսակից անձրևանոցը հանես թե չէ` անձրև է գալու, ուրեմն պայուսակիցդ հանած անձրևանոցը  դիր տեղը:

Շատ եմ հավանում մարդկանց` ետևիցս խոսելու սովորությունը. ի՞նչ է, ավելի լավ կլիներ, եթե իրենց անհեթեթություններըը դեմքի՞ս ասեին: Իմ գործերը երբեք վատ չեն լինում, վատ է լինում ղեկավարության վերաբերմունքը իմ գործերի նկատմամբ:

Թափվող աստղերը շատ ռոմանտիկ, սիրուն ու լավ երևույթ են, բայց լավ է, որ գլխիդ չեն ընկնում:

Իսկական ընկերը նա է, որ տված պարտքը ետ չի ուզում, այլ անընդհատ քեզ հանգստացնում է, որ այդ պարտքը վաղուց մոռացել է:

Հեղինակներ` Մարիետ Սիմոնյան, Նունե Մովսիսյան