Մի անգամ, ճգնավորի մոտ եկավ մի ճամփորդ և կատարելով ողջույնի ծեսը, նրան խնդրեց իրեն կանգնեցնել ճշմարիտ ճանապարհի վրա:

— Ես գիտեմ, թե ինչն է զբաղեցնում քո մտքերը և  քեզանից գողանում ուրախությունը, — ասաց ճգնավորը: Քո ամբողջ կյանքում Դու կատարելություն ես փնտրում մարդկանց մեջ, և չգտնելով այն, չես կարողանում խաղաղվել: Սակայն ես գիտեմ այդ հիվանդության բուժումը: Յուրաքանչյուրի հետ շփվելուց անհրաժեշտ է փնտրել միայն այն, ինչը սրտովդ է նրա մեջ՝ լրացնելով մեկի որակները մյուսի գծերով և երրորդի հատկություններով: Այդ ժամանակ, հազար տղամարդու մեջ Դու կգտնես լավ ընկեր, իսկ հազար կնոջ մեջ՝ Մեծ Սեր…

Հեղինակ` Միհրդատ Ռոստոմի Մադաթյան

Արժե արդյոք զայրանալ խոլորձների պատճառով

Ձենի մի վարպետ խոլորձներ (օրխիդեաներ) շատ էր սիրում:
Մի անգամ, ճամփորդության մեկնելուց առաջ, նա աշակերտներին հրահանգեց ինչպես հարկն է խնամել տաճարի խոլորձները:
Աշակերտներն ամեն ինչ անում էին վարպետի ցուցումների համաձայն, բայց մի անգամ դիպան ծաղիկների տակդիրին: Խոլորձներով ծաղկամաններն ընկան հատակին ու փշուր-փշուր եղան: Աշակերտները սարսափելի վախեցան, նրանք արդեն պատկերացնում էին, թե վարպետն ինչքան կզայրանա ու որքան խիստ պատիժ է սպասվում իրենց:
Դե իսկ վարպետը, ճամփորդությունից վերադառնալով և կատարվածի մասին իմանալով, կանչեց բոլոր աշակերտներին և ասաց.
-Ես այս խոլորձները տնկել էի միայն այն բանի համար, որ դրանք ընծայեմ Բուդդային, նաև նրա համար, որպեսզի իմ մեջ աշխատասիրություն դաստիարակեմ: Եվ, իհարկե, ես այս խոլորձները նրա համար չեմ տնկել, որպեսզի զայրանամ ինչ-որ մեկի վրա:

Հեղինակ՝  Հրաչյա Ամիրյան  (ձեն առակ, «Ապրելու արվեստը» շարքից)

Ասույթներ

Իմաստությունը գալիս է հանգիստ լինելու ունակության հետ: Պարզապես նայիր և լսիր: Ավել ոչ մի բան հարկավոր չէ: Երբ դու հանգստության մեջ ես, երբ դու պարզապես նայում և լսում ես, դա քո ներսում ակտիվացնում է հասկացություններից զերծ բանականությունը: Թող հանգստությունն ուղղորդի քո խոսքերն ու գործերը:

Էկհարտ Տոլլե

Հանգստությունը հանգստության մեջ` ճշմարիտ հանգստություն չէ: Միայն այն ժամանակ, երբ դու հանգստություն ես ձեռք բերում շարժման մեջ, հիրավի հասու ես դառնում դրախտային բնույթին: Ուրախությունն ուրախության մեջ` ճշմարիտ ուրախություն չէ: Միայն այն ժամանակ, երբ դու ուրախության հասու լինես տրտմության մեջ, կհասկանաս, թե ինչով է ապրում սիրտը:

Անհայտ հեղինակ

Լուսանկարը՝ անձնական արխիվից

Առաջադրանք

1. Ուշադիր կարդա տեքստը:

2. Քո կարծիքով՝ ի՞նչ ասել է խաղաղություն: 5-7 նախադասությամբ գրավոր վերաբերմունք արտահայտիր:

3. Ի՞նչ ես կարծում՝ ի՞նչ գույն ունի խաղաղությունը, ինչո՞ւ: Խոսքդ փորձիր հիմնավորել: