Ամենայն հավանականությամբ, այսօր՝ ապրիլի 8-ին, «Հայկական կակաչ» բլոգի հաշվիչը կհատի 200 000-ի սահմանը: Այդ փաստը մտորելու տեղիք տվեց:
Հենց սկզբից ասեմ, որ մրցակցության կամ դրա նման դրսևորումների առհասարակ հակված չեմ, մեղմ ասած՝ չեմ սիրում: Ու հենց էդ պատճառով կայքը հայկական կրթական մեդիադաշտից դուրս բերվեց՝ գրանցվելով չեզոք գոտում:
Նախ, որովհետև ես պրոֆեսիոնալ բլոգավար չեմ, ու կայքն էլ թարմացվում է ըստ ունեցած հավեսի ու գտած ժամանակի՝ երբ որ անհրաժեշտություն կամ ասելիք է լինում:
Քանի որ բլոգավարության մասին շատ է խոսվել, այսօր նպատակահարմար եմ գտնում խոսելու արդյունավետ բլոգավարությունից: Դրանք, կարծում եմ, միանգամայն տարբեր բաներ են:
Արդյունավետ բլոգավարություն, իմ կարծիքով, առաջին հերթին նշանակում է ընթերցող ունենալ: Ունես ընթերցող, բլոգավար ես, չունես այդ ընթերցողը, կներես, մեդիա ես սպառում. միևնույնն է, այսօրվա թողարկածդ անորակ նյութը վաղը վերածվելու է մեդիաաղբի:
Եթե ինձ հարցնեն՝ որպես բլոգավար, հիմնականում ինչով եմ զբաղվել վերջին կես տարում, կխոստովանեմ՝ բլոգիցս առանց դույզն-ինչ ափսոսանքի ջնջում եմ ամբողջական բաժիններ, նյութեր ու տեսանյութեր: Եթե թողարկում եմ մի նյութ, ապա գոնե մեկը պիտի ջնջվի կամ երկու նման նյութեր միացվեն: Կհարցնեք՝ ինչու: Սիրով կպատասխանեմ.
-Որովհետև գնահատում եմ մեդիայի յուրաքանչյուր սմ-ը, խնայում եմ ինձ տրված այդ թանկ տարածքն ու հասկանում, որ այն անսահմանափակ չէ: Ես դա հասկացա, երբ մի սիրուն օր տեսա, որ երկու տարում մսխել եմ ինձ հասանելիք մեդիատարածքի արդեն 27 տոկոսը:
Այսօր ես ուզում եմ, շա՜տ եմ ուզում անպայման շնորհակալություն հայտնել Նորին գերազանցություն պատվիրատուին՝ իմ ընթերցողին: Շնորհակալություն իմ կայք մտնելու, նյութերը կարդալու, իմ կողքին լինելու ու աջակցելու, մեկնաբանություններ թողնելու, առաջարկների և խորհուրդների, ու էլի շատ ու շատ բաների համար…
Խորին հարգանքով՝ Հայկական կակաչ