Յուրաքանչյուր մարդ նույնքան յուրահատուկ է, որքան նա, ով երբևէ ապրել է, հիմա ապրում է կամ էլ երբևէ կապրի ապագայում: Դուք բոլորդ սուրհանդակներ եք: Ամեն մեկդ: Դուք յուրաքանչյուր օրվա կյանքի մասին ուղերձ եք կրում: Ամեն մի ժամ և ամեն մի պահ: Ամենը, ինչ դուք մտածում եք, խոսում կամ անում եք՝  ուղերձ է: Ձեր ամբողջ կյանքը՝  ձեր դասն է: Եթե դուք մտածեիք, որ վաղը ուրիշները կանցնեն այն ճանապարհով, որով դուք եք այսօր անցնում, կանցնեի՞ք նույն այդ ճանապարհով:

Դուք կարող եք մտածել, որ մարդիկ կախում չունեն ձեզանից: Բայց դա այդպես չէ: Ձեզնից յուրաքնաչյուրը կապ ունի շատ ավելի մարդկանց հետ, քան կարծում եք: Իրականում բոլոր այն մարդկանց վրա, ում հետ դուք շփվում եք, ձեր օրինակը ազդում է: Դուք նրանց տեղեկատվություն եք փոխանցում կյանքի մասին: Դուք նրանց փոխանցում եք, թե կյանքն իրենից ինչ է ներկայացնում, ինչպես է կառուցված, և նրանք ընդօրինակում են ձեզ, նմանակում են ձեզ, ձեր ասած տեղեկությունը տանում են իրենց աշխարհ՝  այն դարձնելով սեփական կյանքի մի մասը:

Այդպես են վարվում ձեր երեխաները: Այդպես են վարվում բոլոր երիտասարդները, ովքեր տեսնում են ձեզ, ճանաչում են ձեզ, ում վրա դուք ազդեցություն ունեք: Ու կապ չունի՝  նրանք երեխաներ են, թե ոչ:

Այդպես են վարվում ձեր հարազատներն ու մտերիմները: Այդպես են վարվում բոլոր մարդիկ, ովքեր տեսնում են ձեզ, ճանաչում են ձեզ, ում վրա դուք ազդեցություն ունեք: Ու կապ չունի՝  նրանք ձեր մտերիմներն են, թե ոչ:

Այդպես են վարվում ձեր հարևանները: Այդպես է վարվում ձեր ժողովուրդը: Դուք հենց ժողովուրդն եք: Ժողովուրդը բաղկացած է ձեզանից: Դուք հենց ձեր կրոնն եք: Ձեր կրոնը բաղկացած է ձեզանից: Ամեն ինչ սկսվում է ձեզանից:

Դուք դոմինոյի առաջին քարն եք: Եթե դուք ընկնեք, կընկնեն դոմինոյի մնացած բոլոր քարերը: Ինչից որ դուք եք «խորտակվում»,  դրանից էլ «կխորտակվեն» նրանք: Եվ ուրեմն, անկախ ամեն ինչից,  մի՛ «խորտակվեք», …բայց համընկեք:

Համընկե՛ք ձեր Բարձրագույն Եսի հետ, քանզի ձեր Բարձրագույն Եսը Ճանապարհ ունի անցնելու:

Համընկե՛ք ձեր մեծագույն մտքերին, քանզի դրանք ձեզ կհասցնեն Ճանապարհին:

Համընկե՛ք սիրո հետ, քանզի սերը հենց Ճանապարհն է:

Իսկ, հետո հետևե՛ք, թե ինչպես է ամեն ինչ, ձե՛ր շնորհիվ, իր տեղն ընկնում…

Աղբյուր՝  Нил Доналд Уолш. Беседы с Богом. Новые откровения

Ռուսերենից թարգմանությունը՝  Նունե Մովսիսյանի

Կարող եք ծանոթանալ նաև՝  «Նիլ Դոնալդ Ուոլշ» կայքէջին