Մարդիկ միասին են, քանի դեռ ուզում են միասին լինել: Ո՛չ պարտքը, ո՛չ պատիվը, ո՛չ բարոյականությունը չեն կարող մարդկանց շղթայել միմյանց: Հենց մարդը որոշեց հեռանալ, կհեռանա՝ թողնելով տունը, երեխաներին, մահամերձին: Քանի դեռ չի ուզում հեռանալ՝ կմնա:
Եթե մարդն ուզում է մնալ, քո թերությունները չեն խանգարի: Բայց, երբ մարդն ուզեց հեռանալ, քո առավելությունները չեն պահի նրան:
Ինչքան էլ դու ոչ գեղեցիկ և ոչ հրապուրիչ լինես, կգտնվի ինչ որ մեկը, ում դու դուր կգաս: Ինչքան էլ դու ցանկալի և լավը լինես, կլինի ինչ որ մեկը, ով կմերժի քեզ:
Եթե քեզ մերժում են, դա դեռ ոչինչ չի նշանակում: Դու դրանից վատ կամ պակաս չես դառնում: Դրանում, ըստ էության, սարսափելի ոչինչ չկա: Կա աշխարհում մեկը, և նա քեզ ընդունում է:
Ինչպես կյանքում կա ընդունում, այնպես էլ մահվան դեպքում կա բաժանում: Պահի՛ր այն, ինչ ունես, մի՛ ցանկացիր այն, ինչ կորցրել ես, և մի՛ վախեցիր կորցնելուց:
Ուրախացիր, որ կա մեկը, ով քեզ լույս է բերում: Ինքդ քեզ լուսավորիր. ինչքան շատ լույս, այնքան քիչ վախ, իսկ ինչքան քիչ վախ, այնքան քիչ խավար հոգում:
Տերևը, որն ուզում է վերադառնալ ծառի մոտ, կարող է լողալ հոսանքին և թռչել քամուն հակառակ: Բայց ծառը տերևին չի աճեցնի առաջվա ճյուղի վրա:
Ինչքան շատ սիրես, ինչքան շատ սեր տաս, այնքան շատ քեզ կմնա: Եթե սեր տալուց դու ցավ կամ ատելություն ես զգում, նշանակում է՝ դու մարդուն շոկոլադապատ թույն ես տվել: Հազիվ թե նման պարգևի համար արժե շնորհակալություն պահանջել:
Ազա՛տ արձակիր: Թույլ տուր մարդուն, բացի քո սիրո հայելին լինելուց, լինել ինքը (առավել ևս, եթե դա այդպես է): Սիրելի մարդուն ազատ թողնելը հազվագյուտ տաղանդ է և …հազվագյուտ անեծք:
Եղի՛ր քեզ հետ, եղի՛ր արժանապատիվ, մոռացի՛ր վախի մասին, մի օր նա, միևնույնն է, կվերադառնա: Բայց ոչ այսօր:
Հավատա՛: Վստահի՛ր: Շնորհակալ եղի՛ր: Մի՛ մտածիր այն մասին՝ ինչ է լինելու: Մտածիր միայն այն մասին ինչն այստեղ է և հիմա, կրակի և ջրի մեջ է, աստղերի ներքո:
Հեռացիր՝ նախքան մեռած սերը կսկսի գարշահոտություն արձակել: Արի՝ նախքան ցանկությունը մոլեգնության կվերածվի:
Այն, ինչ առնում են փողով, միայն փողային արժեք կունենա: Այն, ինչ ձեռք է բերվում մուրացիկությամբ, լացով, գռփելով և գողանալով, մի օր կկորսվի: Այն, ինչ բարի կամքի դրսևորում է և արվում է սրտանց, անգին է:
Ինչպե՞ս ճանաչել քո մարդուն: Շատ հեշտ: Դու գնում ես հանդիպման և ճանապարհի կեսին բախվում ես նրան: Նա չգիտեր: Դու չգիտեիր: Դուք գտաք: Եվ ուր էլ որ շարժվում էիք առաջ՝ այժմ միասին եք ճանապարհին:
Աղբյուրը՝ Ника Батхен
Լուսանկարը՝ անձնական արխիվից (Թորթում լիճ. Էրզրում)
Ռուսերենից թարգմանությունը՝ Նունե Մովսիսյանի
Հայկական կակաչ (Papaver Armeniacum) 
Уведомление: 2015-2016 ուս. տարվա նախագծեր | Հայկական կակաչ (Papaver Armeniacum)
Уведомление: Մարդիկ միասին են, քանի դեռ ուզում են միասին լինել | Բարի Գալուստ