Ու մեզ համար ոչինչ վախենալու չէ, մենք միասին ենք՝ կրակի մոտ: Շատ-շատ դարեր առաջվանից այստեղ ենք՝  արևի լույսով ողողված, կամացուկ պտտվում ենք այս գողտրիկ Երկրում: Մենք կարող ենք հանգստանալ, իսկ հետո նորից ստուգել՝ ի՞նչ կա այնտեղ…

Անձրևը քո թաց մազերն են, մաքուր ջրի կաթիլները, թանկարժեք, ինչպես զմրուխտի հատիկներ: Ու այս ամենը մեզ նվիրել են ամպերը: Մենք թրջվել ենք, ջրով ողողել է անձրևն ու մեզ բերել իր խշշոցը: Մենք մենակ ենք անձրևի պատի ետևում:

Ի՛նչ հարմարավետ է այս խոնավ Երկրում…

Անձրև՛, մեր բարի, երկրային Անձրև: Եթե Երկրի վրա անձրև չլիներ, մենք կփախչեինք այստեղից, կգնայինք այնտեղ, ուր անձև է գալիս: Անձրև՛: Անձրև՛:

Դու հարցնում ես՝ ինչու եմ ես անձրև սիրու՞մ …Որովհետև մենք երկուսով ենք: Մենք հարկադրված չենք լինի հյուր գնալու, ու ոչ մեկն էլ մեզ հյուր չի գա, որովհետև…անձրևում է:

Անձրև է, և ոչ մեկը մեզ չի խանգարի համբուրել խոնավ շուրթերը:

Անձրև՛…քեզ անհրաժեշտ է իմ ջերմությունը, առանց ինձ դու մրսում ես, Անձրև՛ է:

Անձրև՛, և դա միայն մերն է, երկրայինը: Բոլոր մոլորակներում՝ սև, երկրային, նարնջագույն երկնքում՝ ամենուր արևը նույնն է: Իսկ անձրև գալիս է միայն մեր մոլորակում:

Տա՛ք անձրև, դու մեզ մոտ լա՞վ ես զգում, դու չե՞ս լքի մեզ, ճի՞շտ է:

Հարմար ու հեշտ է ապրել Երկրի վրա: Ճի՞շտ է:

Դու թախծում ես: Քեզ ասել են, ….որ երկրի վրա անձրևները տարբեր են լինում. գորշ, սնկաձև…

Այո՛, դա ճիշտ է: Այդպես լինում է:

Իսկ դու մի՛ հավատա, մի՛ հավատա, սիրելի՛ս, մի՛ հիշիր, մի՛ պատմիր տանը ոչ մեկին այդ մասին:

Իսկ, երբ դու ինձ մոտ թռչես ընդմիշտ, խոստանո՛ւմ եմ, ամեն ինչ կլինի այլ կերպ:

Ես երդվում եմ. մեզ մոտ երբեք ոչինչ չի կրկնվի, ես քեզ համար լուսե ամպերի ժանյակի միջով վար կբերեմ արևի երկար շողեր, որոնք կվերածեմ միլիոնավոր բյուրեղյա կաթիլների:

Թռի՛ր:

Աղբյուր՝  Той, которая впервые узнала, что такое дождь

Ռուսերենից թարգմանությունը՝  Նունե Մովսիսյանի

Ցանկության դեպքում կարող եք ծանոթանալ նաև՝ 

Լեոնիդ Ենգիբարով «Վերջին ռաունդ»

Լեոնիդ Ենգիբարով, նովելներ

Ենգիբարով, ժամանակակից հեքիաթներ