Մեզանից շատերն այն աստիճան են դիմադրում սեփական դատարկությանը, որ ինքնամոռաց կառչում են ուրիշների հետ ունեցած ցանկացած տեսակի հարաբերություններից:

Մենք ասում ենք մեկ մեկու. «Օգնի՜ր ինձ դատարկությունս լցնել»: Եթե դա տեղի է ունենում, մենք այն կոչում ենք իսկական սեր, իսկ, եթե չի ստացվում`պահանջում ենք ամուսնալուծություն:

Այլ կերպ ասած` մենք ուրիշներին օգտագործում ենք սեփական դատարկությունը լցնելու համար, բայց սա միայն հիասթափություն է բերում: Ինչո՞ւ:

Որովհետև մեզնից յուրաքանչյուրը պարտավոր է հանդիպել իր դատարկության հետ և ճանաչել նրա իրական արժեքը:

Եթե սեփական դատարկությունից փախչում ես` սպասելով, որ ուրիշները լցնեն այն, ապա իմացիր, որ ինքդ քեզ մշտապես դատապարտում ես ձախողման: Իսկ գիտե՞ս` ինչու:

Որովհետև դատարկությունը մեր իսկական էությունն է:

Աղբյուրը`  Стефен Волински — Дао Хаоса

Ռուսերենից թարգմանությունը` Նունե Մովսիսյանի

Հետգրություն

Նյութը թարգմանելու ընթացքում հիշեցի, որ նման մի բան եմ գրել: Բլոգը փորփրեցի ու ահա` գտա սա: Խնդրեմ.

Եթե ուզում ես հանդիպել քեզ

Եթե ուզում ես հանդիպել ինքդ քեզ հետ, դատարկվի՛ր մինչև վերջ ու կիմանաս՝ ով ես դու իրականում: 

Դա նման է քնից արթնանալուն պես հայելու մեջ նայելուն:

Դա նման է խաղաղված ջրի մեջ սեփական արտացոլանքը տեսնելուն:

Դա նման է …մերկության:

Կան մարդիկ, ովքեր մեզ օգնում են լցնել սեփական դատարկությունը: Այնինչ մարդիկ, հարկ եղած դեպքում, պիտի օգնեին նաև հանդիպել սեփական դատարկությանը:

Մարդիկ կան, ում ներկայությամբ դու հեռանում ես ինքդ քեզնից: Մարդիկ էլ կան, ում միջոցով, ինչպես հայելու մեջ, դու հանդիպում ես ինքդ քեզ: Այդ մարդիկ քիչ են, բայց կան, ապրում են քեզ մոտիկ, բայց …հեռվում:

Նրանք հայելի-մարդիկ են: Հենց այդ մարդիկ են, որ օգնում են քեզ տեսնել ներսդ: Նրանք նաև այնքան մեծահոգի են գտնվում, որ թույլ են տալիս հոսել իրենց միջով: Հոսել ու դուրս գալ այնպես, ինչպես եկեղեցուց ես հեռանում՝ պատարագված, խնկաբույր ու մաքրված…

Չէ՛ , ինչ ուզում եք ասեք, պետք է կարողանալ գնահատել սեփական դատարկությունը:

Դատարկությունը մաքրություն է` չգրված էջ, նոր եկած ձյուն, առանց ոտնահետքի կածան…

Զարմանալի է, եթե էդքան դատարկվել եմ ու համարյա թե տեսնում եմ իմ հատակը, բա ինչո՞ւ եմ վախենում թափվելուց…

Ն.Մ.