Մեզանից և ոչ մեկը չունի այս վիրուսի իմունիտետը:

Ամեն ինչ լավ կլինի: Իրոք, այդպես է լինելու:

Մենք այս իրավիճակին կդիմանանք սիրով, հումորով և համբերատար: Մենք միասին լաց կլինենք, միասին կծիծաղենք: Մենք մեր մեկուսացման մեջ կգտնենք միասնություն: Ամենավատը մի օր կավարտվի:

Ու մենք շատ բան կսովորենք:

Իսկ հիմա մենք պիտի բախվենք մեր ներսի դժվարագույն զգացողությունների հետ: Դա վա՛խն է: Ցա՛վը: Կյանքի հի՛ն ձևի կորուստը: Մեր փշրվա՛ծ ծրագրերը:

Մենք կսովորենք նայել ինքներս մեզ: Մենք ոչ մի տեղ չունենք գնալու, մեր ներսից բացի: Ոչ մի տեղ չունենք վազելու, ոչ մի տեղ` թաքնվելու:

Սուրբ կարանտին է:

Մենք կսովորենք նայել մեր ձանձրույթին: Մեր անհանգստությանը: Մենք կհանդիպենք մեր այն մասի հետ, որն ուզում է լինել մեկ ուրիշ վայրում, մեկ ուրիշի հետ: Մենք դեմ առ դեմ կհանդիպենք մեր այն մասի հետ, որն ուզում է ինչ-որ ուրիշ բան անել, ունենալ ինչ-որ ուրիշ փորձ, ապրել ինչ-որ ուրիշ Հիմա, ապրել ինչ-որ ուրիշ կյանքով:

Մենք կթողնենք այն հիանալի ապագան, որը ծրագրել էինք:

Մենք թույլ կտանք` ապագայի երևակայությունը մեռնի, կազատենք այն մեզանից և լաց կլինենք դրա համար:

Մենք կվերադառնանք Ներկայի ուժին և ջերմությանը: Մենք նվեր կբերենք մեր տուն: Մենք ամեն ինչ կսկսենք նորից, մեր նոր տունը կկառուցենք նոր հողի վրա: Մենք կուսումնասիրենք նոր ապրելակերպ, որը մեզ սկզբում տարօրինակ կթվա, բայց լի կլինի հնարավորություններով:

Մենք դանդաղ, բայց կշարժվենք Բարության, Լռության ուղղությամբ:

Մենք միմյանց հետ անկեղծորեն կխոսենք կյանքի, անցողիկության և մահվան մասին: Եվ նաև այն մասին, թե ինչպես ենք մենք վերաբերում բոլոր այն փոփոխություններին, որոնք տեղի ունեցան մեր և մեր սիրելիների հետ:

Մենք կսովորենք կյանքը փոքր-ինչ ավել գնահատել: Այո՛, միգուցե սովորենք կյանքը մի փոքր ավել գնահատել:

Եվ մենք կսկսենք ապրել սրտով` բաց կլինենք տարերքի առաջ: Կընկղմվենք անորոշության մեջ` գտնելով մեր փրկությունն այնտեղ: Մեզանից և ոչ մեկը ապահովագրված չէ հին, ծանոթ կաղապարների փլուզումից:

Սա՛ է իրերի կարգը, այդպես է եղել մի՛շտ: Այս տեսանկյունից ոչ մի վատ բան էլ տեղի չի ունեցել:

Ճգնաժամը պարզապես նշանակում է «շրջադարձային պահ», և մեզանից ոչ մեկը ապահովագրված չէ այս շրջադարձից: Հնի ոչնչացումը հնարավորություն է տալիս նորի ծնունդին: Մի՛շտ էլ այդպես է եղել:

Մենք անպայման դուրս կգանք այս վիճակից` Սիրով, Հումորով, Համբերությամբ:

Մենք ռեստարտ կլինենք և կթարմանանք: Պատրաստված կլինենք փորձությունների դեմ: Ավելի ուժեղ կլինենք, քան նախկինում էինք:

Ես ձեզ ուղարկում եմ իմ ներսում եղած ողջ սերը, ընկերնե՛ր ջան:

Լուսանկարը` ֆեյսբուքից (Վենետիկում վերջին օրերին աննախադեպ երևույթ է գրացվել. ջրանցքներում ջուրն երբևէ այսքան մաքուր չի եղել)

Աղբյուրը`  Джефф Фостер

Ռուսերենից թարգմանությունը՝ Նունե Մովսիսյանի

Կարող եք ծանոթանալ նաև  «Ջեֆֆ Ֆոստեր»  կայքէջին