Բարի մարդը, եթե նույնիսկ արդարացիորեն պաշտպանում է ինքն իրեն, կոնֆլիկտից հետո վատ է զգում: Նա կատարվածից հետո ուժ չի ունենում, իսկ սիրտը ծանրանում է:
Աշխարհում կան իշամեղուներ: Եվ կան մեղուներ: Մեղուները սնվում են ծաղկափոշով և նեկտարով, միևնույն ժամանակ ծաղիկներ են փոշոտում: Քաղցր մեղր են պատրաստում: Մեղուներն օգտակար են:
Կան նաև իշամեղուներ: Կուլ են տալիս սարդեր և ուրիշների թրթուրները: Ուտում են փոքր կրծողներ, նույնիսկ՝ թռչնակներ: Սատկածներից էլ չեն խորշում: Դառն է նրանց մեղրը: Խայթոցներն էլ վտանգավոր են…
Մեղուները նույնպես կծում են, եթե իրենց վտանգ է սպառնում: Եթե հարձակվում են նրանց վրա և զայրացնում են նրանց: Այդ ժամանակ մեղուները կարող են կծել, բայց կծելու հետ մեկտեղ կորցնում են խայթը: Եվ սատկում են:
Իսկ իշամեղուները կարող են կծել այնքան, որքան ուզում են, նրանց հետ ոչինչ չի պատահի:
Մեղուների թույնը հաճախ բուժում է, փաստորեն, նույնիսկ մեղուների ցասումից կարելի է բուժվել: Բայց նրանք անխուսափելիորեն սատկում են, եթե կծում են:
Այդպես են և բարի մարդիկ: Եթե հարձակվում են նրանց վրա, նրանք կարողանում են պատասխանել և պաշտպանվել: Բայց հետո նրանք այնքա՜ն վատ են զգում: Եվ կորցնում են ուժերը, էներգիա էլ չկա: Եվ բարի մարդը հանգստացնող կաթիլներ է ընդունում, բռնում է սիրտը, պառկում է անուժ կամ լաց է լինում:
Իսկ չարը կծում է և իրեն լավ է զգում… Հաճույքով կծում է ու հեռանում: Գնում է թրթուրներ, կրծողներ կամ դրանց նման «համով» բաներ ուտելու…Իշամեղուն մնում է իշամեղու. ինչքան պետք է, այնքան էլ կկծի:
Սա է բարու և չարի տարբերությունը: Մեկին ոչինչ չի պատահի, իսկ մյուսները հիվանդանում են և մեռնում, եթե նրանց նկատմամբ ագրեսիա է իրականացվում: Եվ, երբ պարտադրում են:
Բայց մեղուներն իրենց պաշտպանելու մի ձև էլ ունեն: Նրանք պարսով հավաքվում են ագրեսորի վերևում և սկսում են միահամուռ բզզալ: Չեն կծում, ուղղակի հավաքվում են ինչպես ահարկու ամպ: Եվ վախենալու թվացող ագրեսորը կիսամեռ ընկնում է: Գիտնականները դեռ քննարկում են, թե ինչու է այդպես պատահում: Թթվածի՞նն է պակասում, թե՞ մեղուներն իրենց շուրջը յուրահատուկ մագնիսական դաշտ են ստեղծում: Ոչ ոք հաստատ չգիտե: Ասեք, որ լավ միջոց է…
Բարի մարդկանց պետք չէ չարացնել: Նրանք շատ են: Նրանք միշտ միասին են պաշտպանվում: Իսկ չար իշամեղուն ինքն իր համար թող ապրի: Նա էլ է Աստծո ստեղծածը, չնայած որ «մեղրը» դառն է և սնունդը՝ զզվելի…
Աղբյուրը՝ Анна Кирьянова
Ռուսերենից թարգմանությունը՝ Նունե Մովսիսյանի
Հայկական կակաչ (Papaver Armeniacum) 
Уведомление: Մեղվապահություն, մեղու, մեղր, մեղրամոմ՝ տոներ, ծեսեր, ավանդություններ, խորհուրդներ, ուսումնական նյութեր | Հասմիկ Մաթևոսյան
Уведомление: Մեղվապահություն, մեղու, մեղր, մեղրամոմ՝ տոներ, ծեսեր, ավանդություններ, խորհուրդներ, ուսումնական նյութեր | Ծեսերի բաց լաբորատորիա