Իմաստության մեկ րոպե. թեթևամտություն

Վարպետն ասում էր, որ ոչինչ չարժե լուրջ ընդունել, նույնիսկ իր ուսմունքը: Այդ մասին նա մի պատմություն էր սիրում պատմել.

— Իմ առաջին աշակերտը այնքան թույլ էր, որ վարժությունները ուղղակի սպանում էին նրան: Իմ մյուս աշակերտը քիչ էր մնում խելագարվեր, քանի որ շատ էր աշխատում իմ հանձնարարած վարժություններով: Իմ երրորդ աշակերտը բթացավ չափից շատ մտահայելուց: Միայն չորրորդին հաջողվեց պահպանել առողջ միտքն ու մարմինը:

— Ինչո՞ւ հենց նրան. – հարցրեց ինչ-որ մեկը:

— Որովհետև նա ուղղակի հրաժարվում էր կատարել իմ վարժությունները:

Ծիծաղի պայթյունը անլսելի դարձրեց Վարպետի ձայնը:

Աղբյուր՝  http://dangxuan.livejournal.com

«Աղաչում եմ Քեզ, Տեր, ներել  իմ երեք գլխավոր մեղքերը: Առաջին, ուխտագնացություն եմ կատարել քո շատ սրբատեղեր՝ մոռանալով, որ Դու ամենուր ես: Երկրորդ, ես հաճախ եմ դիմել քեզ խնդրանքներով՝ մոռանալով, որ Դու ինձանից ավելի շատ ես հետաքրքրված իմ բարեկեցությամբ: Եվ վերջապես, ես ներում եմ խնդրում քեզանից՝ գիտենալով, որ Դու ներում ես մեզ մեր մեղքերը, մինչև մենք կհասցնենք նրանք կատարել»:

Հովիկ Չարխչյանի բլոգից

Գիտակցում

Պատկերացրեք` հիվանդը գալիս է բժշկի մոտ և գանգատվում ցավից: Իսկ բժիշկը նրան պատասխանում է.

-Շատ լավ, ես ամեն ինչ հասկացա: Գիտե՞ք՝  ես ինչ կանեմ: Ես դեղ դուրս կգրեմ ձեր հարևանի համար:

-Շնորհակալություն, -ուրախացած ասում է հիվանդը,- հենց դա կբուժի ինձ:

Անհեթեթությո՞ւն է: Բայց մենք բոլորս հենց այդ ձևով ենք պահում մեզ: Քնածին միշտ թվում է, որ իր կյանքը նշանակալիորեն կհեշտանա, եթե շրջապատող մարդիկ փոխվեն դեպի այս կամ այն կողմը: Դուք տառապում եք միայն այն պատճառով, որ քնած եք. չնայած դրան, դուք մտածում եք. «Ի՜նչ հրաշալի կլիներ, եթե ահա այս մարդը ուրիշ դառնար, եթե իմ հարևանը, իմ պետը, իմ կինը հանկարծ փոխվեին»:

Մենք  ուզում ենք, որ մեր շուրջն եղած մարդիկ փոխվեն, այ այդ ժամանակ, իբր, մեզ մոտ ամեն ինչ կարգի կընկնի: Բայց դուք երբևէ մտածե՞լ եք, թե ձեր կնոջ կամ ամուսնու բնավորության փոփոխություններն ինչ օգուտ կբերեին: Ախր դուք կշարունակեիք մնալ նույնքան խոցելի և նույնքան ապուշ. դուք շարունակում եք քնել: Եթե ինչ-որ մեկը պետք է փոխվի, ապա առաջին հերթին` հենց դուք: Եվ բուժվելը հենց ձեզ է պետք:

-Ինձ հետ ամեն ինչ կարգին է, որովհետև աշխարհի հետ ամեն ինչ կարգին է,- պնդում եք դուք:

-Սխալվում եք: Աշխարհի հետ ամեն ինչ կարգին է, որովհետև ինձ հետ ամեն ինչ կարգին է,-այդպես ասում են հասկացողները:

Աղբյուր՝  Հրաչյա Ամիրյանի ֆեյսբուքյան էջ

Կարող եք ծանոթանալ նաև՝  Էնթոնի դե Մելլո, պատմվածքներ