«Չկան երեխաներ, կան մարդիկ»: Հուլիսի 22-ին ծնվել է մանկավարժ, բժիշկ, գրող, լրագրող, հասարակական գործիչ Յանուշ Կորչակը:

Նա առաջինն է նախաձեռնել «Երեխաների իրավունքների համաձայնագրի» ստեղծումը, որը 1989թ. ընդունվել է Միավորված Ազգերի կազմակերպության կողմից։

Գրել է «Փողոցի երեխաներ», «Մոսկին, Իոսկիոն և Սրուլին», «Մաթիուշ առաջին թագավորը» վիպակները, «Խելագարների սենատ» պիեսը, զրույցներ, հոդվածներ և այլն: Կորչակի դաստիարակչական համակարգի գլխավոր սկզբունքները շարադրված են «Ինչպես սիրել երեխային» գրքում:

Զոհվել է 1942թ.-ին՝  Տրեբլինկայի գազախցում՝ իր 200 սաների հետ: Կյանքի վերջին օրերին Կորչակն իր օրագրում գրի է առել հետևյալ տողերը. «Ես ոչ մեկին չարը չեմ կամենում: Չեմ կարող: Չգիտեմ` դա ինչպես  է արվում»:

Մեծ մանկավարժի ծննդյան օրվա կապակցությամբ՝ որպես հարգանքի տուրք, թարգմանաբար ներկայացնում եմ Յանուշ Կորչակի «Աստծո հետ առանձին» գրքից մի հատված՝ «Մանկավարժի աղոթքը»:

Մանկավարժի աղոթք

Ես Քեզ չեմ ուղղում երկար աղոթք, Տե՛ր:  Չեմ ուղարկում անհամար հոգոցներ: Խորին խոնարհումներ չեմ անում: Քո փառքը չեմ գովաբանում և չեմ մատուցում ճոխ զոհաբերություն: Քեզ չեմ ձգտնում մոտենալ, Տիրակա՛լ, ստանալու համար ողորմությունդ: Չեմ խնդրում Քեզնից մեծարում: Իմ մտքերը չունեն թևեր, որ իմ երգը երկինք հասցնեն:

Բառերն իմ գունագեղ չեն և ոչ էլ խնկաբույր ու ծաղկավետ:

Հոգնած եմ ես և ուժասպառ:

Աչքերն իմ խամրել են, մեջքս կքվել է հոգսերի բեռից: Եվ, այնուամենայնիվ, Քեզ եմ դիմում, Տե՛ր, սրտագին խնդրանքով: Ես ունեմ թանկարժեք մի բան, որը չեմ ուզում վստահել եղբորս, առհասարակ՝  մարդուն:

Վախենում եմ՝ չեն հասկանա, չեն ոգեշնչվի, կանտեսեն ու կծաղրեն ինձ:

Ես մինշտ Քո առջև եմ՝ հնազանդներից հնազանդս, բայց իմ այս խնդրանքը կլինի համառ:

Ես միշտ Քեզ հետ խոսում եմ կամացուկ շշուկով, բայց իմ այս խնդրանքը ես կասեմ բարձրաձայն:

Տո՛ւր երեխաներին ուրախություն, օգնի՛ր ու օրհնի՛ր նրանց ջանքերը:

Ո՛չ դյուրին, բայց գեղեցիկ ճանապարհով ուղղորդիր նրանց:

Քո տիրական հայացքը երկնային բարձունքներից ի՛նձ ուղղիր:

Ուղղելով մեջքս՝ պահանջո՛ւմ եմ Քեզնից, քանի որ ինձ համար չեմ պահանջում:

Այս խնդրանքի դիմաց ընդունիր իմ միակ ունեցվածքը՝ ցավը:

Ցավն ու աշխատանքը:

Աղբյուրը՝  Януш Корчак, Молитва воспитателя

Ռուսերենից թարգմանությունը՝ Նունե Մովսիսյանի

Կարող եք կարդալ նաև՝  Յանուշ Կորչակ, «10 պատվիրան ծնողներին»