Կարող ենք նույնիսկ մենք Աստված լինել

Շնորհներով ու ձիրքերով ընտիր:

Գրիգոր Նարեկացի

Ի՛նչ է նշանակում առողջություն, ի՞նչ արժեք է դա:

Մարդու առողջությունը աստուածային պարգև է: Մարդը հոգու և մարմնի հանգույց է, ուստի առողջությունը վերաբերում է թե հոգուն և, թե մարմնին: Հիվանդությունը, ընդ որում, եթե դիտենք իբրև քաոս, աններդաշնակություն և տարրերի համամասնության, կշռույթի խախտում, ապա առողջությունը կընկալվի իբրև ներդսւշնակություն, տարրերի համակշռույթի վերականգնում, գեղեցիկ և բնական համադրություն, մարմնական տարրերի ներդաշնակ փոխազդեցություն և լիարժեք կյանք:

Հոգևոր առողջությունը առնչակից է ողջախոհությանը, առողջ բանականությանը:

Հոգեպես առողջ է այն մարդը, որի ճանաչելու, զգալու և կամենալու կարողությունները պատշաճ մակարդակի վրա են, ում միտքը պայծառ է, զգացմունքները՝ մաքուր և կամքը ազատաբաղձ:

Հոգեպես առողջները կարողանում են տարբերել ճշմարտությունը կեղծիքից, ճշմարիտ արժեքները կեղծ արժեքներից, այսինքն՝ ողջամիտ են:

Հոգեպես առողջները կարեկցում և գործնական օգնություն են ցուցաբերում իրենց այն եղբայրներին, որոնք կարոտ են օգնության:

Նրանց հավատքը զորավոր է:

Հոգին առողջացնել նշանակում է նախ և առաջ հոգին ազատագրել ստոր կրքերից: Հոգևոր առողջությունը նույնանշանակ է մարդկային կատարելությանը և ձեռք է բերվում ապաշխարության, սրբության, հավատի, հույսի, սիրո և այլ առաքինություններով:

Հոգով առողջ լինել նշանակում է լինել խաղաղ, իսկ խաղաղությունը աստվածային պարգևների և առաքինությանց վախճանը կամ լրումն է, նույնակարգ՝ երանությանը: Միայն հոգով առողջ մարդն է արժանի աստվածային արքայության:

Աղբյուր՝ «Նարեկացու հետ», Հանրագիտակ, Երևան 2011, էջ 157

Լուսանկարը՝  Հայ մատենագրութեան թուանշային գրադարանի ֆեյսբուքյան էջից

Կարող եք ծանոթանալ նաև՝  «Նարեկացու խոսքի գիտական հիմնավորումը» հոդվածին