Գիտակից կյանքը սկսվում է այն պահից, երբ աշխարհից և շրջապատող  մարդկանցից դադարում եք սպասել, որ նա կամ նրանք կստեղծեն այնպիսի պայմաններ, որոնք քեզ լավագույնս դրսևորվելու հնարավորություն կընձեռեն:

Շատերն են սպասում փոխհատուցման (компенсации) անհաջող մանկության, ձախողված սիրո և շատ այլ բաների համար՝  այդ սպասումների մեջ էլ անցկացնելով կյանքը:

Որքան շուտ դու դադարեցնես անիրատեսական ծրագրերի և ակնկալիքների ավտոմատ ընթացքը, այնքան շատ տարիներ կշահես ինքդ քեզ կերտելու համար: Մինչ դու սպասում ես, քո ներուժը ննջում է:

Գործողությունների ազատությունը այն չէ, երբ ինչ-որ մեկը ինչ-որ բան կարող է քեզ տալ, այլ այն, ինչը դու վերցնում ես:

Ազատ լինել նշանակում է խորապես պատասխանատու և  բարոյական լինել: Իսկական ազատությունը ենթադրում է մեծ սեր, հոգատարություն և հարգանք այն ամենի նկատմամբ,  ինչը քեզ շրջապատում է:

Ազատություն նշանակում է՝  այս պահից սկսած ոչ թե ուրիշների խրախուսանքը կամ մեղադրանքն է ուղղորդում կերտելու ինքդ քեզ, այլ դու ես պատասխան տալիս, թե ինչպես ես վարվում ինքդ քո և աշխարհի հետ:

Ազատությունը հաճախ շփոթում են եսակենտրոն անկարգության հետ: Սանձարձակ մարդն իրեն դնում է աշխարհի կենտրոնում և ակնկալում, որ աշխարհը պարտավոր է հաշվի նստել այդ փաստի հետ: Բայց աշխարհը շատ ավելին է. վաղ, թե ուշ տրորում է բոլոր նրանց, ովքեր զանց են առնում իր օրենքները:

Ազատությունն ու անկախությունը սկսվում է ինքն իրեն և աշխարհը ճանաչելուց: Ճանաչել այնպես, ինչպես դու և աշխարհը իրականում կաք ու գոյություն ունեք:

Աղբյուր՝  Нина Рубштейн. Самосотворение

Ռուսերենից թարգմանությունը՝  Նունե Մովսիսյանի