Userland և Live ամսագրերը առաջինն են եղել, որոնք տեղեկություններ են հաղորդել բլոգների վերաբերյալ: Այսօր բլոգերների մեծ մասն օգտագործում է Google Blogger-ը կամ WordPress-ը: Այդ ծառայությունները մարդկանց թույլ են տալիս համակարգչային կոնկրետ ծրագրեր չտիրապետելու դեպքում անգամ ստեղծել նոր բլոգներ` առցանց գրառումներ իրականացնելու նպատակով: Գործում են նաև աուդիո-բլոգներ (podcasts) և վիդեո-բլոգներ (vlogs):
Բլոգների ամբողջ հմայքը, ինչ խոսք, ազատությունն է:

Սա ամենևին չի նշանակում բարձիթողիություն: Ճիշտ հակառակը: Յուրաքանչյուր մեկը, ով վարում է բլոգ, առավել պատասխանատվությամբ է մոտենում իր թողարկած նյութերին: Պատահական չէր, որ 9.1 դասարանցիների բլոգներում նյութեր տեղադրելուց առաջ մշակվեցին աշխատանքային հետևյալ կանոնները:

Սովորողների հետ քննարկման արդյունքում որոշվեց տնային ամենօրյա աշխատանքները բլոգներում չտեղադրել հետևյալ պատճառաբանությամբ`

• սխալ գրված աշխատանքները հանրությանն ի ցույց դնելը էթիկային դեմ է և նպատակահարմար չէ.
• տնային ամենօրյա աշխատանքները առանձնակի հետաքրքրություն չեն ներկայացնում, և ըստ այդմ, ցուցադրելու կարիք չկա:

Բլոգը անձնական վիրտուալ տարածք է, որը հանդես է գալիս ինչպես ամսագիր, այն էլ օրագիր: Բլոգներով ուսուցման դեպքում սովորողների մոտ կարևոր հմտություններ են զարգանում: Մեծանում է պատասխանատվությունն ու ինքնավերահսկողությունը: Սովորողները աշխատում են ճիշտ գրել, իրենց մտքերը ճիշտ արտահայտել, որովհետև իրենց նյութերն ու կարծիքները նայում են շատերը` ուսուցիչներ, ընկերներ, պատահական և ոչ պատահական այցելուներ: Այս հանգամանքը սովորողների մոտիվացիան կտրուկ բարձրացնում է, և նրանք, (փաստն եմ արձանագրում), դրա շնորհիվ սկսում են ավելի լավ գրել:

Քանի որ բլոգները կապված են իրար հետ, դա կարող է նաև ուսումնական համայնքի խթան դառնալ: Հեղինակները արտահայտում են իրենց մտքերը, աջակցում միմյանց: Դա սովորողներին տալիս է ձայնի իրավունք, որի շնորհիվ նրանք հայտնում են իրենց կարծիքները և տեղեկացնում իրենց ուսումնական հաջողությունների մասին:
Բլոգներով ուսուցումը զարգացնում է ոչ միայն գրագիտությունը, այլև խթան է դառնում հետազոտական մտքի համար: Սովորողը բլոգը վարելիս սովորում է նաև գնահատել իր ունեցածն ու քննադատորեն վերաբերվել առցանց տարաբնույթ ռեսուրսներին:

Բլոգները, առայժմ, օգտագործում ենք հետևյալ կերպ:

• Դասավանդողը տնային աշխատանքը տեղադրում է իր բլոգում` հղումը ուղարկելով սովորողին: Սա օգտակար է նրանով, որ ժամանակի ընթացքում հավաքվում են մեդիա-ուսումնական փաթեթներ, տարաբնույթ առաջադրանքներ: Բլոգը ակտիվ օգտագործելու դեպքում կարող է դառնալ առարկայական առաջադրանքների և մեդիա-ուսումնական փաթեթների շտեմարան: Զետեղվում են թեմատիկ հղումներ, քննարկումների համար նախատեսված և այլ ուսումնական տեսանյութեր: Մենք պայմանականորեն այդ բաժինը անվանել ենք Մեդիամատյան: Սովորողները կամ պետք է ուղարկեն աշխատանքի պատասխանը կամ comment-ի տեսքով տեղադրեն նյութի ներքևում: Դասավանդողի համար սա հարմար ձև է նաև առցանց ստուգում անցկացնելու համար:
• Դասավանդողը առաջարկում է կարդալ իր բլոգում տեղադրված նյութերը և համապատասխանաբար խնդրում, որ սովորողներն իրենց բլոգներում տեղադրեն հետաքրքիր նյութեր, նորություններ: Փաստորեն, սովորողներն իրենց բլոգների ստեղծման ճանապարհին կարդում են նաև իրենց ընկերների և այլոց բլոգներում եղած նյութերը: Բլոգներից ընտրված նյութերը, որոնք հայտնվում են կայքում, ուղարկվում են նաև մյուսների էլեկտրոնային անհատական հասցեներին:

Թեև մեկ-երկու ամիսը կարճ ժամանակահատված է բլոգի «դեմքը» տեսնելու համար, բայց և այնպես, 9.1–ում կարելի է առանձնացնել Վիկա Մարկոսյանի, Էմիլ Սիլանյանի, Էլեոնոր Հարությունյանի, Սողոմոն Վարդանյանի, Լիլիթ Գևորգյանի, Վահե Աբրոյանի բլոգները: Իսկ բլոգների, որպես կրթական գործիքների, բերած բազմաթիվ օգուտներից առայժմ կարելի է փաստել հետևյալը`

• բարձր մոտիվացիան
• շատ գրելու և շատ կարդալու լայն հնարավորությունը
• քննարկումները և առցանց շփումը
• պատասխանատվության և ինքնավերահսկողության մեծացումը
• ընկալման և տեղեկատվության մշակման արագությունը:

Մի բան ակնհայտ է` բլոգները, ճիշտ և ակտիվ օգտագործելու դեպքում, կարող են ապահովել արդյունավետ և հետաքրքիր ուսումնական միջավայր:

Նունե Մովսիսյան